新加坡一名男子12年嚟憑自製嘅假文憑到處搵工做經理，甚至成功跳槽做財務總監，4個月賺超過28萬港元人工，直至後尾跳槽到建設公司，詭異行徑令僱主發現唔對路，主動警方舉報，先至令惡行曝光。經當地法院審判，依名男子被判有期徒刑15個月。
據報今年55歲嘅楊男透過網上搵文憑樣本，列印出嚟後再將自己嘅名字P上去，再影印文件去假冒文憑，偽造嘅文憑包括新加坡國立大學法律系學士、南洋理工大學會計榮譽學士同工程師學士、南大成績單、美國安德魯大學工商管理碩士、澳洲會計師證書同新加坡特許會計師協會成員證書等。
檢方查出，楊男自2009年12月就開始偽造文憑，12年內先後到13間公司見工，喺其中11家公司得到高職，職位包括執行總監、審計經理、財務總監等。舊年1月19日，楊男打算跳槽到一間建設公司，公司向南大查證文憑真偽嗰陣，發現楊男根本唔係南大學生，立即報警處理。
報導指，楊男曾到一間電器私人有限公司做咗4個月嘅財務部主管，賺取超過新幣5萬1258元（約港幣28萬），後來因工作表現欠佳被人炒；佢亦曾喺2019年9月到Boon Chang Structure有限公司擔當總財務長，做咗3個月就因表現差，收到好多投訴，於是佢自稱眼力衰退而辭職，3個月內共賺新幣1萬4324元（約港幣8萬）。
法院審理嗰陣，律師稱被告而家已安分守己，做廚房助理同收銀員，月薪唔超過新幣1000元（約5700港元），礙於佢嘅年紀，無法搵到全職工作，加上佢患有高血壓同腎病，因此懇求法官從輕發落。法官最終判佢坐監15個月。
資料來源：SickLeaveTomorrow